Premiaziuns da chaschiel d’alp

Mintg’onn han lieu diversas premiaziuns da chaschiel d’alp. Tuttina sch’i sa tracta da premiaziuns localas u da concurrenzas naziunalas: per ils producents da chaschiel d’alp èsi impurtant da preschentar lur products elavurads cun amur e passiun ad ina giuria e da forsa schizunt gudagnar in premi.

Concurrenza da chaschiel d’alp a l’Olma

Premiaziun annuala da chaschiel d’alp da la Svizra e dal Liechtenstein. Las sorts da chaschiel inoltradas vegnan giuditgadas e valitadas d’ina giuria d’experts. La premiaziun e la surdada dal premi han lieu l’october e vegnan accumpagnadas d’in referat dal fatg e da musica. Premiadas vegnan las meglras sorts da chaschiel d’alp en las categorias chaschiel mez dir, chaschiel dir, chaschiel da splanar, chaschiel-nursa, chaschiel-chaura e mutschli.

La marca da tetg Chaschiel d’alp svizzer sustegna tant sin nivel da communicaziun sco era da finanziaziun questa distincziun impurtanta da products da qualitad.

Olma Alpkäse-Prämierung

Concurrenza bernaisa da chaschiel d’alp

Mintgamai il di da rogaziun il settember ha lieu la concurrenza bernaisa da chaschiel d’alp. Quest’occurrenza è s’etablida en il decurs dals onns ed è daventada fitg populara. Ils producents da chaschiel d’alp tramettan var 200 sorts dad Alpkäse AOP resp. Hobelkäse AOP sco era mutschlis per als laschar valitar. La valitaziun vegn fatga tenor criteris determinads. Ils visitaders pon degustar tut las sorts da chaschiel inoltradas.

Premiaziun chantunala da chaschiel d’alp dal Plantahof

La premiaziun grischuna da chaschiel d’alp ha ina tradiziun da plirs decennis. Pli baud aveva ella lieu mintga dus onns. Dus experts visitavan l’alp e valitavan tut la producziun. Oz ha la premiaziun da chaschiel d’alp lieu centralmain en il Plantahof a Landquart a partir da mez enfin la fin da settember. L’occurrenza promova la qualitad dal chaschiel d’alp e lascha identifitgar svelt svilups sbagliads. Las signunas ed ils signuns vegnan uschia encuraschads da far in product singular era la stagiun sequenta e las medias survegnan in’invista en la producziun dal chaschiel d’alp.

Las sorts da chaschiel vegnan valitadas da trais gruppas da giuria. Mintga gruppa da giuria sa cumpona d’in signun e d’in chau d’alp, d’in cussegliader e d’in expert da consum. Il schema da valitaziun cumpiglia las suandantas posiziuns: impressiun exteriura e qualitad da conservar, massa, cumposiziun da las foras e natiralmain il gust e l’aroma. Ils mancos vegnan enumerads en in rapport e procuran per ina diminuziun dals puncts. La valitaziun en il rom da la premiaziun da chaschiel d’alp è però adina ina registraziun da la situaziun mumentana. I dat natiralmain differentas opiniuns quai che reguarda la qualitad. Tscherts sbagls sco salà, amar u asch senta però la gronda part dals consuments.

Malgrà che las sorts da chaschiel èn producidas tenor ina receptura sumeglianta èn ellas fitg diversas. Quai dependa tranter auter da differenzas dal pavel sin las pastgiras, da la magasinaziun dal latg e dal tschaler.

Prättigauer Alp Spektakel

Premiaziun da chaschiel d’alp Molseralp

Suenter la stagiun d’alp surpiglian tschients da visitaders la rolla d’experts e valiteschan las numerusas sorts da chaschiel d’alp.

Alpkäseprämierung Molseralp

Fiera uranaisa da chaschiel d’alp cun premiaziun

Ina festa da la racolta tut apartia fa la pastriglia uranaisa mintgamai il november: a Seedorf lascha ella premiar en differentas variaziuns las sorts da chaschiel d’alp ch’ella ha producì la stad si d’alp. La fiera uranaisa da chaschiel d’alp attira adina dapli visitaders era d’utrò. Ella è daventada ina part integrala da l’agenda uranaisa.

Ürner Alpchäsmärcht