Vorder Menigen
L’alp
L’Alp Vorder Menigen sa chatta en la Val da Diemtigen, en la Part Sura Bernaisa, sin 1’850 m s.m. I sa tracta d’ina alp privata che vegn chargiada cun ca. 25 vatgas da latg e biestga sitga. Il temp d’alpegiaziun dura da ca. mez zercladur enfin la fin da settember. L’onn 2005 è la veglia tegia arsa suenter in culp da chametg ed è silsuenter vegnida reconstruida. Sin quest’alp vegn chaschà cun ina chaldera da 300 liters sur ina fuaina protegida d’in mantè.
Il team
Nus, Jessica e Raphael, scrivain in blog cun contribuziuns davart noss temp sin l’Alp Vorder Menigen. Igl è nossa 10avla stad cuminaivla ad alp en la Part Sura Bernaisa. Da la partida èn era noss uffants Antonia ed Emil. Betg mancar na dastga natiralmain era Rocky, noss border collie. El è noss cumpogn e collavuratur fidà. Ordaifer il temp d’alpegiaziun stain nus a Maria Alm en l’Austria. Nus abitain sin in bain puril e lavurain sco assistents agriculs e l’enviern en il territori da skis.
Noss products
Nus producin surtut chaschiel d’alp e chaschiel splanà bernais AOP, ma tut tenor la dumonda era raclette e mutschlis. Il latg chaschain nus sin la Vorder Menigen cun grass cumplain, qvd. nus na sgromain betg il latg avant che chaschar. Paintg faschain nus mo per noss purs per l’agen diever.
Excursiuns
Infurmaziuns davart las activitads en il parc natiral da la Val da Diemtigen chattais Vus sin www.diemtigtal.ch. Ina destinaziun da viandar populara damanaivel da la Vorder Menigen è per exempel il Lai da Seeberg. El sa chatta sin ina planira auta tranter la Val da Diemtigen e Zweisimmen.
