Tompey
L’alp
L’alp da Le Tompey sa chatta en la part davos dal Hongrintal en la vischnanca da Corbeyrier. La tegia d’alp è situada sin 1580 m s.m. Il 1. da zercladur chargiain nus nossas vatgas che restan qua enfin la fin da settember. Nus essan là sa chapescha gia avant e suenter quella data, cunquai che nus stuain semtgar l’alp. Ella tutga a la Confederaziun. La famiglia Ziörjen prenda a fittanza il manaschi dapi il 1971. Nus avain la gronda fortuna da pudair chaschar tut la stad en la medema tegia. Autras puras ed auters purs ston midar durant ina stad pliras giadas l’alp cun lur vatgas e lur material da producziun. La stad avain nus var 70 vatgas (Red Holstein, Holstein, Simmentaler, SF, Brown Swiss) e 130 arments. Nus avain anc trais asens, ils dus chauns Rocky e Bob, set giaglinas e var diesch portgs. Tar nus n’èsi mai lungurus! L’alp cumpiglia cun la grippa e la palì 180 ha. Nus producin var nov tonnas chaschiel d’alp L’Etivaz AOP.
Il team
Il team sa cumpona da Nicolette, la mamma da mes um Florian, e da Rodolf, il frar dad el. Nus avain era dus emploiads che passentan la stad ensemen cun nus. In dad els è Blazei che vegn gia dapi diesch onns tar nus.
Noss pitschen mat passenta ussa gia sia segunda stad si d’alp!
Igl è bel che l’agricultura da muntogna è ina chaussa da famiglia. Nus pudain perquai er adina quintar cun l’agid da Stefan, il segund frar da Florian, e da sia amia Sandra. Mes bab e noss amis ans sustegnan er adina gugent.
Noss products
L’Etivaz AOP è in chaschiel d’alp dir che vegn producì tranter ils 10 da matg ed ils 10 d’october cun latg criv. Passa 2800 vatgas che pasculeschan sin 130 alps situadas sin 1000 fin 2000 m s.m. furneschan lur latg per far il chaschiel. Il latg vegn stgaudà unicamain en la chaldera d’arom sur il fieu. Il chaschiel d’alp L’Etivaz è stà l’emprim chaschiel cun il certificat svizzer AOC ch’è vegnì registrà l’onn 2000 en il Register federal da las denominaziuns d’origin ed indicaziuns geograficas. Consequentamain ademplescha l’Etivaz AOP las spetgas pretensiusas ed exactas dal carnet da duairs.
