Enavos

Fasons

L’alp

L’alp è situada sin 1’715 m s.m. Ella sa cumpona da dus stavels, quel sut e quel sura. Il stavel sut sa chatta sper la tegia d’alp cun stalla da rentar. Il stavel sura è ina mulschera e sa chatta sut la chamona da Schesaplana (chamona dal CAS), situada sin ca. 1’900 m s.m. L’alp vegn chargiada cun ca. 120 vatgas da la cooperativa d’alp da Seewis e cun 60 portgs d’alp.

Quatter giaglinas ed in chaun avain nus er anc sin noss’alp. Ultra da quai alpegiain nus ca. 130 vadels sin l’Alp Fasons; quels vegnan dentant survegliads d’in vadler separà.

 

Il team

Nus avain tuts tranter 19 e 25 onns. Peter e Melanie han gia rimnà experientschas d’alp. Sco team essan nus l’emprima giada ensemen sin in’alp.

  • Peter Odermatt, signun
  • Melanie Hertner, zezna
  • Beni Grubenmann, paster
  • Larina Grubenmann, vaschandra

Noss products

Sin l’alp producin nus en emprima lingia chaschiel d’alp e paintg d’alp grischun. A l’entschatta da la stad d’alp producin nus anc tschigrun, en emprima lingia per ils purs.  

Qua e là faschain nus er anc sezs jogurt, dentant mo per l’agen basegn.

Excursiuns

Ca. 3 km davent da la tegia d’alp sa chatta la chamona da Schesaplana. Quai è ina chamona dal CAS, nua ch’ins po era far in paus per mangiar e baiver insatge u per pernottar. La chamona è averta mintga di da las 7.00 fin las 22.00. Telefon: 081 325 11 63 u 079 612 60 18. 

I vala la paina da visitar il museum d’alp. Quel sa chatta ca. 2 km en direcziun dal stavel sura. Là pon ins contemplar blers objects vegls e guardar co ch’ins chaschava pli baud.

Il Lai da Lün è er in bel lieu per far in’excursiun. El sa chatta sur il cunfin, en l’Austria, cunquai che nus essan qua fitg damanaivel dal cunfin.  

Sch’insatgi viandescha gugent e n’ha betg sturnizi, vali era la paina dad ir sin il culm «Schessi» Schesaplana. El porscha in panorama magnific.

Lieu

Charrar fin en il center da Seewis; davent da là ves’ins la baselgia. Suenter la baselgia, a la fermada da l’auto da posta, sviar en la curva a dretga. Suenter suandar questa via fin a la bifurcaziun, nua che la via sanestra cuntinuescha sin l’Alp Fasons ed a dretg ora cuntansch’ins l’alp vischina da Val. Sviar a sanestra e charrar per lung da la via fin ch’ins vesa la tegia.