Infurmaziuns per consuments

La differenza tranter il chaschiel d’alp ed il chaschiel da muntogna

Chaschiel d’alp n’è betg il medem sco chaschiel da muntogna! Il chaschiel d’alp vegn producì unicamain la stad durant l’alpegiaziun. Il latg criv sto derivar da vatgas che pon pascular libramain sin ina pastgira d’alp. Il chaschiel da muntogna percunter vegn producì tut l’onn en las regiuns muntagnardas en las chascharias dal vitg, damai era l’enviern, cura ch’ils animals vegnan pavlads en stalla cun fain.

Conservar chaschiel d’alp correctamain

In’entira magnucca: la magnucca entira anc betg snizzada conserv’ins il meglier en tschaler tar ina temperatura da 10 fin 15 °C. Ideal è in clima plitost umid. Sch’il conturn è sitg, pon ins influenzar positivamain il clima per exempel cun metter en vischinanza ina sadella aua. Tgi che vul conservar il chaschiel pli ditg, fa il meglier d’al lavar ina giada l’emna cun in pez umid e d’al volver mintgamai cun questa chaschun, uschia ch’el giascha mintgamai sin l’autra vart. Sch’ins conserva ina magnucca correctamain, tegna ella plirs mais.

Ina magnucca snizzada: sche la magnucca è snizzada, la duess ins metter en frestgera. Il meglier fan ins da tagliar giu dal chaschiel in toc pli pitschen che tanscha per ils proxims dis. Quel pachetesch’ins en folia transparenta. Cun vacumar ils tocs chaschiel resta la qualitad anc meglra. Sch’ins pachetescha endretg ina magnucca snizzada, la pon ins conservar en frestgera 4 fin 7 emnas. Ins na duess betg schelentar il chaschiel, perquai ch’il process da madiraziun cuntinuant vegn lura interrut. En pli po sa midar il gust ed igl è pussaivel ch’i dat stgarps.

Empustar online chaschiel d’alp

Sin divers portals online pon ins empustar chaschiel d’alp. Visitai per exempel:

Dal bain purilalpinaverabuyfresh